0 Hiwang

Pecoh hiwang sang lamban. Bughibu tiyakni luh. Bughung-bughung sai biasani kambogh jak batang mik batang mak lagi lagi keliak’an. Nyipi. Kambang ghos di geleghni lamban teluyuk layu. Mataghani mak nyiagh segok di balek awan. Ina lunek Mala pangsan. Pak lunek Badi mak sanggup lagi nahan waini matani. Cubaan sekali sinji mabiyak temon.

Ya ambulance sampai pekon tumpak senyap diganggam hiwang, pecoh jak tuku mik tukuni lamban, nyambut sirineni, sai mangking ngighis hati, nyayak dada sapa sai ngedengini. Lapang luagh latap. Minak muaghi, indai kanca, jak ghedik jak jawohni, sai ampai nihan tihabu jak guwai nambi tanno adu muloh luwot, kidang ghiya muneh, layin lagi suasanani hati.

Maknihan ngedok sai nyangka hak aga gheji lajuni. Mak ngedok sai ngenyana gheji malangni dighi. Kidang aga bugaga dipa mandok kuasa sai lagi. Tuhan sai Maha Esa sai nantuko takdirni.

Ampai seminggu sai ghadu Nur ‘Aini anak mulini Ina Lunek Mala mulang jak Tangerang ngusung kabar helau, meghanai sai jadi tambatan hatini. Sangun adu jak saka wat dibabayangkeni ia aga ngusung calon kemantinni anjak Tangerang, kota ghangni tinggal selama ji, kota kedua setelah kota kelahiranni. Jelma ni ulun. Kidang payu ani Ina Lunek Mala tian ghuwa mukajong. Aga tighepako lagi. Jalmani ulun jalmani ghamni gegoh gawoh, sai penting buyun bughukun. Mak wadani gila kik adu gheno mejawoh kik aga busasilawan. Seno gawoh.

“Sangun aku dangkung pai muloh, Nur…,” ani Ina Lunek Lema, Ina Lunekni Nur, sambil ia ngasasedu, ngungguk-ungguk. “Sangun jak keti mik sa adu mak mebangek ghasani atiku. Ajo dia bang injuk gheji jadini kadu.” ani sambil ngehapus wai matani jama injangni. Suaghani tisedak-sedak. Tambah saka injangni tambah basoh. Tambah lamon minak muaghi sai ghatong, tambah kedok hiwang. Sapa ia sai ngadengini lamon sai nutuk muneh tikeluh.

Ampai telu ghani sai ghadu Nur ghek ghasanni tinikahko, tipesta-meriahko muneh jama jalma sang pekon. Du’a selamat jak doh jak unggakni. Mansa berkah jak minak muaghi. Nyambut sedekah jak kanan kighi. Kik ngingokko dinana injuk jadi ghajado seghani.

Adu telu tahun Nur buguwai di Tangerang, kanjak ia tamat SMA-sa. Setahun sekali, kapan kak Idul Fitri ia mulang nungga ulun tuhani. Kidang sekali sinji ia mulang mawek tenggalan. Tian ghatong meghamik. Mulani Nur tian ghuwa ghasanni. Kadu ulun tuha ghek minak muaghini ghasanni nyusul. Kik pak mak meghamik nihan, kidang cukupdo guwai kuaghi balakni tian.

Nayuh. Pesta adat tipakai. Kikpak mak sauyun sahelau nihan, kidang pokok-pokokni adu dijalanko tian. Budu’a ngeni malaikat pandai. Budikegh ghek nyumbah ghek ngecat sulan. Titambah muneh jama pesta orkes sai jaman tanno. Gegohdo jama sai bagheh. Pakaian adat Lampung. Nur ghek kemantinni busanding di istana. Jadi ghaja seghani. Nur nyakak nihan jama dandanan ghek pakaianni. Matani nyiagh-siagh, serasi jama makeup-ni sai makelagh. Kik pak kemantinni ghaghada kaku. Injuk tikanjat, injuk tihabu.

Ya guwai ghadu. Mak kapenah seghani lagi tian ghuwa nangguh muloh mik Tangerang. Ulun tuha ghek keluargani inggomni adu mena mulang. Ijin jak perusahaan ghangni buguwai sangun angkah saminggu. Makdo cukup kik nughutko kehaga. Makkung kuk lebon buyani di ghang laya, hak adu aga muloh muneh do. Kehagani sai tuha gila tian ghuwa tinggal di pekon pai saminggu. Mampan ko ahu, ghek in kenal unyin di minak muaghi. In mak masighi putagu lagi. Kidang aga tighepako. Atoghan perusahaan mak dacok ghepa ani negham.

Pagi hayu. Diilingko keluarga ghek minak muaghi, Nur ghek inggomni cakak bis, muloh mik Tangerang. Muloh mik keghughek’an sai adu dihalu tian di udi. Sai dikanek akal tian. Ngemulai kehidupan baru. Ngeghangkai ghuwa hati jadi sai. Nyunsung masa depan. Kakalau munyaian. Kakalau meghawan. Du’ani minak muaghi disegok keni di lom pakitni.

Kidang makkung kuk bela ilingni tian. Makkung kuk lebon bayanganni ghegah jak cukutni jan, ajo tanno ia adu muloh luwot, sampai di dibi ghani sai pepot. Ampai nambi tian jak lalang wawa, tanno ia adu lain dunia. Ampai nambi tian jak sababuwa’an jama minak muaghi, tanno Nur mak dacok titagu lagi.

Tibayang gayani ia ampai sampai sa. Tibayang helauni sambutan jak keluarga. Kelakagh ghek lalang waya nyenangko hati. Kabagh helau sai diusungni. Guwaini mak mesaka lagi. Adu jak buka, jak Idul Fitri.

Sangun semakkungni tian ghuwa beghangkat Ina Lunek Lema injuk adu wat firasat. Dangkung pai keti ghuwa beghangkat, ani. Tunggu pai seghani lagi. Kemayangan kik sa minggu. Gham sa’aninongan ghek ngalepasko habu. Kidang ghupani mak dacok titawagh lagi. Tian ghuwa musti beghangkat di ghani sinji. Adu bujanji. Ijin cuti jak perusahaan mak dacok titambah-tambah lagi. Dipa tian aga wat muneh acagha di pekonni kemantinni.

Ya tanno ajo tibukti. Layin hak sampai di tujuan, kintu ajo ia adu muloh mik lamban. Layin muneh hak tian ghuwa muinggom, kintu ia tanggalan. Layin muneh hak kehaga, kintu kecelakaan. Ghepa hati mak laju suya. Kejadian sinji mak tisangka-sangka.

Bis celaka sedi sai nyadangko segalani. Cadang di badan. Cadang di hati. Pecoh muneh kemuaghian. Tinggal sai tibabiti.

Bis sai ditumpang tian ghuwa sa sangun latap di penumpang. Penumpang buka, ulun mulang jak ghantauan. Ulun sai aga muloh, ghek sai ampai aga nyepok guwaian. Sangun dinana gila lagi delom suasana Idul Fitri. Unyinni ulun sai meghantau di Jawa mulang mehili. Sangun waktuni do mulang setahun sekali.

Sepa bis sai beghangkat latap unyin di penumpang. Payah kuk aga mansa bangku kik mak pandai-pandai ngeghebutni. Lamon ulun sai tikekoh mak laju beghangkat mani mak kebagian bis. Kidang mujogh tian ghuwa mansa bangku, kena sai dihadap muneh.

Kidang ghupani sangun nasip tian ghuwa sai malang, bis sai ditumpang tian ghuwano kughuk jughang, tibalik jeghungkang. Unyinni penumpang lintang pukang. Kidang sai anehni muneh, angkah tian ghuwa gawoh sai cadang. Unyinni penumpang selamat, kecuali tian ghuwa, sai mejong di hadap, di geleghni supegh.

Layin muneh hak mak neghima. Mungkin sinji sangun takdir jak Ilahi. Mungkin sangun adu garisni. Kidang sapa sai mak tikiwang, nyandang bagian sai sangun cadang. 

Sai muneh nyadangko hati, tian ghuwa mak nyatu lagi, mak di dunia, mak di lom bumi, induh kik di akherat nanti. Mufakat jama ahli warisni, jasad tian ghuwa tiulangko mik pekon masing-masing. Kik  pak wat muneh sai ngusul keni, nyin tian ghua tisaiko di lom bumi.

“Nur, Nur, … mak kusangka nasipmu injuk gheji,” ani keminanni sambil ngungguk-ungguk miwang, ngelap wai matani jama sinjang. Tambah dibi, lamban tian tambah latap. Tambah ghamik. Hiwang tambah kedok. Ungguk-ungguk bucampogh jama bitian mak buujung, buganti-ganti, nyadangko hati sapa ia juga sai ngadengini.

Langit pepot, tambah kelom. Meghcap lunik. Injuk mak mesaka lagi aga teghai. Gelarni Nur masih tisebut-sebut, tambah saka tambah jawoh….*** 

Catatan:

1. Cehita sinji cehita fiksi. Kik wat kejadian sai magagegoh, seno ingkah kebetulan gawoh.
2. Maaf kik lamon kata sai mak tepat. Ternyata nulis di lom bahasa Lampung mak mabudah. Masih lamon kata sai nyak mak pandai.  
3. Ceghita sinji timuat muneh delom page Majalah Nyuara, Facebook

Read more

0 Mulang

Tiap dibi Nurbaya tiingok jama lamban tian di bimbin, jama mak khek bakni, jama puakhini, jama tamong kajongni, jama pangkalan mandi di kudanni lamban tian, jama kebau tian, jama taman lunik sai dijagani tiap khani, pukokni jama unyinni sai wat dudi, unyinni sai jadi bagianni lamban tian di bimbin. Lamban sai ngebalakko ia, kanjak ia lakhekh sampai ngamuli. Lamban sai mak pernah ditinggal keni selama ji, seumokh hukhekni.

Khepa dia cekhitani kambang ros sai kutanom di khedik pemandian, sai kuuyunkon dibi pagi sa, ani di lom hati. Halok pak mak ngedok lagi sai ngekhiwon keni. Sapa tian sai aga betah nguyunko kumbang. Adik-adikni bakas unyin. Mak khek bakni mak mungkin hak wat waktu. Injuk agi dacok dikhasani khumni kambang ros suluh sa.

Kidang sai paling nyadang ko hatini kik ia tiingok jama mak khek bakni. Tantu mak kaangian mak ngedok nyak. Selama no angkah ia do sai ngatatulung guwaini makni di dapokh. Tantu tanno mak unyin ngaguwaikeni, ani di lom hati. Bayanganni pudakni mak khek bakni injuk makhedik di matani. Khisok tibekhuh muneh luhni kik ia mak ketahan lagi.

Lamban tian di bimbin udi lamban nunggal. Mak ngedok tetanggani. Tetangga khek puakhi-puakhi tian tinggal di pekon unyin. Jawohni pekon jama bimbinno halok lebeh kukhang sekilo, di hantakha sabah bekhak. Kidang pak lamban tian nunggal, terkucil ya, kidang mak hak kalah jama lamban sai wat di pekon. Tihangni anjak kayu uyun sai tigekhgaji, bentuk segi pak sempurna, layin hak jak kayu bulat injuk tihangni anjung di lom pulan. Janni melanggakh, lebeh jak telu mitekh, tisani jak kayu helau khek titatah uyunko jama gekhgaji. Sesaini jak papan, layin hak sesai khesi, mulus tigekhgaji khek tiketam, rapi khek lukhus. Kik tiliak jak luakh, mak muneh kalah jama lambanni sai batin.

Di gelekhni lamban tian wat wai hilian lunik. Disan khang tian nyani pangkalan mandi, khang tian duwai, mepoh khek bebasuhan. Kidang kik wai nginom tian ngakuk jak sumokh. Di kudanni lamban tian khepong damakh bekhak, campokh jama batang durian khek duku. Sebagian khepong bak tiando sebagian bakni ulun. Di kikhi kananni lamban tian mapangga, mak ngedok batang langgakh, disando khang tian bukakebunan, namom tiyung khek cabi.

Kidang pak tian tinggal di bimbin, tiap khani muneh tian pakhulang mik pekon. Nurbaya khek adik-adikni mik sekula, kik makni mik pasakh nyepok kekukhangan, atau nunggai papuakhi tian sai wat di pekon. Tamong kajongni tinggal jama tian, sang lamban jama tian.

Adu hampekh setahun inji ia mak mulang, mak nyilau lamban tian. Adu setahun seno muneh ia putus kabakh. Mak nihan ngedok kabar bekhita jak lamban di bimbin sapenanni ia lijung jak lamban.

Kuteduh hatini mak lagi suya jama nyak, ani Nurbaya di lom hati. Dipusauni tenaini. Halok kikha-kikha sebulan lebeh lagi anakni hejong. Kik kehagani gila ia tekhok ngelakhekh di lambanni makni, dihepak emakni. Senodo lagi cita-citani.

Kidang semakin dibayang keni semakin sedih, semakin lunik hatini. Mak putus ia budu’a jama sai kuasa, ngilu hatini emakni buubah.

Injuk wek sesolni muneh ia adu nyakikko hatini mak khek bakni. Kidang aga tikhepako, ia mak kuasa ngendaliko cinta. Cinta khatong di luakh kuasani. Di luakh kontrolni. Selama inji ia selalu nukhut jama ulun tuhani, kidang kik masalah sai sinji makdo dacok dikendalikeni lagi. Inji kehendak sai kuasa, ani di lom hati.

Hanafi khatong injuk jak langit, injuk malaikat mak bukepi sang hinggop di singkap bilik khang pedomni, ngegukhah ia ngukhau minjak pagi, kambokh keliling bumi, hinggap di kambang-kambang sai wat maduni. Kanjak tungga pertama, Hanafi selalu di hatini, mak dacok dikas keni lagi.

Dibi pagi, dawah dibingi ia selalu ingok Hanafi. Di dapokh. Di tangbah, di lapang luakh, di bilik, di wai, di kebun, di sabah, dipa-ipa wat Hanafi. Duniani mak ngisi api-api lagi kintu Hanafi. Khek sainyani ia mabalak hati muneh ternyata Hanafi gegoh pengkhasa. Khepa sai dikhasa keni kheno muneh sai dikhasako Hanafi. Bagi Hanafi angkah ia goh muneh duniani. Makani tian khuwa jadi sejoli. Dunia bak tian khuwa.

Sayang bak khek makni mak setuju. Tian khuwa mak pak sreg jama Hanafi. Layin hak uleh khupani atau kelakuanni kidang ulehni ekonomi. Senangun gila Hanafi anakni jelam mak mampu, jawoh di bah kik tibandingko jama keluarga tian. Tian wat khepong damakh, wat sabah berak, wat kebau, wat lamban sai lumayan helau, sedangkan kelurgani Hanafi mak ngedok api-api. Keluarga upahan.

Sangun wat pekhnah dibabayangko makni bahwa ia mak setuju hubunganni jama Hanafi. Ia lebeh setuju kik ia jama Bahrun, anakni tuan Fandi, jelma batin mak ngedok kekukhangan. Sangun dinana gila Bahrun juga khisok ngakhakhedik ia, secara langsung jama ia, khek muneh jama bak khek makni. Kidang ia mak setuju, ia mak gekhing jama Bahrun. Ia mak demon menok jelmani.

Satemonni layin hak Bahrun gawoh, melamon mekhanai bakheh sai ngincar ia, kidang ia  angkah gekhing jama Hanafi. Mak ia ngekhiwonko sai bakheh.

Semakin khedik ia jama Hanafi, semakin makni mak gekhing, semakin jawoh hubungan tian khuwa. Hingga suatu ketika makni mak dacok nahan cawa lagi. Diundahkeni unyin sepa isini hati ini. mak ia ngekhukhuh keni lagi.

“Pukokni nyak mak setuju kik niku jama Hanafi. Kik niku aga kawin jama ia juga, khegah niku jak lamban sinji. Dang nyak disasilau lagi,” ani makni tegas.

Nurbaya nekad. Niatni adu bulat. Api ia juga disangsatkeni asal ia jama Hanafi. Mak ngedok sai dacok ngehalang niatni. Selama mak mundokh jak Hanafi, api ia juga aga ditekhakni.

Subuh khani ia lijung jak lamban, luakh jak singkap, disusul Hanafi. Ditinggalkeni sukhat khek duit cutik di bah kasokh.

Mak khek Bak,

Nyak ngilu maaf nihan nyak mak dacok ngebahagiako keti khuwa. Nyak ngilu keikhlasan jak keti khuwa nempuh jalan sinji. Nyak lijung nutuk Hanafi. Nyak mak aga mulang kik makkung dinikahko keti jama Hanafi.

Tertanda,

Nurbaya.

Singkat nihan sukhatni kidang makejung khek makhelom maksudni. Khek makhelom muneh akibatni. Mak khek bakni pasrah. Mak dacok bubuwat api-api lagi. Satu-satuni jalan tian khuwa harus dinikahko, khepa ya juga kadu ilungni. Kidang injuk ani makni, kik ia nikah jama Hanafi, maka ia harus luakh jak lamban. Nurbaya maklum. Sangun adu disiapkeni hatini jak saka.

***

Nurbaya musau tenaini, tibayang masa depanni anakni nanti. Tinggal jama mentuha sekhba mak mebangik. Hanafi mak ngedok guwai tetap kintu angkah ngandalko guwai serabutan senodo, upahan dija dudi. Kik mak upahan macul atau ngunduh damakh, ia lapah ngawil mik duwai, sasejakhan nyepok sanini gulai. Niatni Nurbaya kik anak tian khuwa adu hejong, tian harus khegah jak lamban. Hanafi setuju.

Kidang wat sai sai nyani ia lunik hati. Niatni aga ngelakhekh dihepak emakni halok mak dacok tikabul. Makni lagi sakik hati. Kidang ia mak putus buhakhap suatu saat nanti ia dacok mulang ngedi ulun tuhani, kik ia adu wek anak nanti. Biasani kik adu wek anak, ulun tuha jadi lunak, ani di lom hati.

***

Minjak pagi diliakni Hanafi mak ngedok di khang pedom. Nurbaya ngelagok. Mak biasani Hanafi adu wek ilung pagi hayu. Kidang mawek ditanyani dipa ilungni.

“Dipa kik abangmu bang jak jeno bingi mak keliak’an,” ani mak mintuhani.

“Ana ngia ia mik ngawil di wai,” ani Nurbaya.

“Biasani mak hak sampai pagi kik mik ngawil,” ani emakni muneh, ngelagok.

Nurbaya tihenyak hatini. Sangundo biasani kik Hanafi mik ngawil mak hak sampai pagi. Ia ngatatekom mak khek bakni pandai mik dipa ilungni abangni, kintu bang ia nangguh jama tian khuwa waktu nyak lagi pedom, ani di lom hati. Kidang bang emakni malah nanya jama ia.

Dipenah tian sampai mawas, mak juga Hanafi ticul. Bak mintuhani mik nanya jama khek-khekni Hanafi, kintu bang tian pandai mik dipa ilungni. Kidang mak ngedok sai pandai. Mak ngedok sai ngeliak.

“Sai tantuni ia nangguh mik ngawil ya lepas isya jeno bingi,” ani bak mintuhani.

“Ngawil dipa?” ani bakas sai.

“Induh, kintu mik ngawil goh ani,”

“Layin kik ia ngawil mik wai Mesuwang kudo?” ani bakas sai muneh, nimbal.

Bak mintuhani Nurbaya tikanjat, tikesau mayani. Wai Mesuwang lamon ulun sai pandai. Ngedengi gelakhni lamon ulun mekhabai. Sangun iwa di dudi pubalak-balak khek melamon, kidang angkah ulun sai nekad gawoh sai bani mik ngawil diisan, khek tian sai mak pekhcaya.

Suasana hening. Ngadengi gelakh Wai Mesuwang tisebut ulun tumpak tihema unyin. Mak ngedok sai cawa lagi. Masing-masing jalan jama pikekhan masing-masing. Kidang pikekhanni bak mintuhani Nurbaya sai paling kacau.

Mak mesaka jak seno mategokh unyin sang pekon. Tuha-ngukha, bebai-bakas, balak-lunik unyinni kumpul di lamban tian. Bak mintuhani khek serombongan bakas langsung mik Wai Mesuwang, bugaga.

Kabanni bebai khek sanak khamik kumpul di tangbahni lamban tian. Sakhakhilongan, mak ngedok sai pandai api sai aga tiguwaiko, kidang kicik’an mak kik dacok titahan. Penyin-penyin didengini bebai ngicik pulalegohan, injuk sasiahan.

“Ui, wai sedi sangun buhaan ngiya,” ani bebai sai.

Mak mintuhani miwang ngungguk-ungguk.

Nurbaya musau tenaini, “Ngilu selamat niku, Nak,” ani. Kadu ia mak ingok-api-api lagi.***

Krui, 31 Maret 2012

Catatan: Cekhita inji timuat juga di page Majalah Nyuara, Facebook, judulni gegoh.

Read more

0 Lamban di Akhis Wai

Kapan kik dibi khani

Mekhamik di pangkalan

Uwat sai lapah mandi

Wat sai lapah bukhasan

Lamban kayu di pinggekh wai udi mawat hak istimewa, gegoh khiya jama lamban-lamban sai bakheh. Sesaini sesai khesi—kawokh sai tipecoh-pecohko bukuhni, tibeditko, kadu tipakuko ditihang. Hatokni anjak bulung khuntan, rumbia bahasa Indonesiani. Tihangni anjak kayu biasa, sai titatah jama candung khiya, layin hak tisani jak baluk bulat segi pak sai tigekhgaji, ditumpuko di atas batu, mak pak beraturan, kidang cukup simetris sehinggoni ia dacok cecok sempukhna, berbentuk segi pak. Lantaini jak batang kayu hanibung. Janni halok wek pak mata jak tanoh. Mawek hak melanggakh ga, kidang cukup langgakh indang mak ditekhak binatang buas. Ruang keluarga khek bilik pedom di atas, kidang dapokhni di bah, sejajar jama tanoh. Di hadapni wat lepau, ruang tamu, khang tian nekhima tamu, khek istirahat.

Jalma pekon sangun gekhing do nyani lamban di akhis wai, indang mak pekhituk duwai lagi, mandi khek mepoh. Praktis. Mak pekhlu nyani sumokh lagi mani adu wat wai balak, apilagi kik waini makecah muneh.

Biasani kik adu wek lamban sai di pinggekh wai, kadu tambah saka tambah lamon sehinggoni kikhi kananni wai seno latap lamban. Kik adu melamon lamban biasani jadi pekon sai muneh. Kadu pekon seno tikeni gelakh ngakuk jak gelakhni wai seno. Halok khenodo ngebani lamon pekon sai gelakhni gegoh jama gelakhni wai sai wat disan.

Lamban saiya terpencil, mejawoh jak pekon. Kidang sekebakni asal jak pekon, minak muakhi tian di pekon unyin. Kik tian wat guwai, minak muakhi tian jak pekon khatong unyin, kheno muneh kik minak muakhi tian sai di pekon wat guwai, tian mik unyin, ninggalko lamban sai di akhis wai no.

Kidang wat sai nyani ulun tikham di lamban seno. Kik dibi khani, lamon jelma jak pekon khatong mandi di pangkalan sai wat di wai sai khedik di lamban seno. Di wai seno senangun wat pangkalan mandi. Waini jernih, makecah kik mak ngedok sai mandi di atasni. Kidang kik wat sai mandi di atas, khisok lamon kiriman bebol pubalak-balak. Wai seno melunik, halok bekhakni angkah sekitar pak mitekh. Di bagian sai dangkalni, medangkal nihan, mak sampai tuwot, kidang dibagian sai khelom, sai di sani ulun khang mandi, makhelom, dacokdo selom, kidang mawat hak sampai kapus. Dasakhni wai seno heni khek batu-batu lunik. Mak ngedok batu-batu balak injuk wai di lom pulan.

Kik pak wai seno medangkal, kidang pakaini makhelom. Kik aga cukhup, kham musti khegah tebing. Tebingni mawat hak melanggakh ga, kidang khisok nyani tikusokh mani maliyut, mani khisok tisikhang khegah cakak, apilagi kik musim panekhai, bunjak liyutni lagi.

Kik tiliak jak wai, lamban seno posisini di atas. Kik aga mik lamban seno, kham musti cakak tebing cutik, kidang wat pepatni sangun disaniko tian pakai tian khegah cakak duwai. Kik musim kemarau wai seno sangun medangkal, kidang kik lagi banjekh, latap pakaini.

Tiap dibi Muzakki khek khik kantikni, khek jalma jak pekon ipa-ipa khatong mandi mik disan. Wai seno setemonni terletak di hantakha khuwa pekon, pekon sai hak kikhini sekitakh tengah kilo jak isan, kheno muneh pekon sai kabelah kananni. Di kikhi kananni wai seno sabah bekhak, jadi jelma pekon ipa ya juga sai aga mik wai seno harus nyikhang sabah bekhak no pai. Khekhada mejawoh juga, kidang mak hak ulun sangkut mandi ulehni.

Tiap dibi muli lunik sai keliak’an di tangbahni lamban seno, ngewawang adingni. Adingni sanak upi halok sekitakh umokh walu bulan kik mak siwa bulan. Kidang kik sanak muli seno halok umokhni sekitakh 12 tahun, maseh kelas nom SD.

Nurpuri gelakhni muli seno, khamah ulun sai muji. Jelmani mesikop temon. Badanni mahelau, mahandak khek makecah, kontras jama keadaan sekelilingni sai serba mak mahelau. Ngeliak Nurpuri di lamban seno injuk ngeliak mutiara delom litak. Lamon ulun sai ngekhasa mak pantas ia tinggal di lom lamban seno. Nurpuri injuk muli puteri, injuk bidadari sai khegah mandi anjak langit.

Sahelau-helau landos

Maseh jak helau pakhi

Sahelau-helau kambang khos

Maseh jak helau Nurpuri

Senodo wayakni sanak-sanak mandi kik tibinta di Nurpuri.

Wat muneh wayak sai lucu:

Bulung cambai lom lesung

Agani muli putekhi

Munyai kuk haban busung

Kik adu tungga Nurpuri

“Nuuurrr ….’ ani Muzakki khek khek kantikni sanak mandi ngeguda. Kidang Nur mak pernah ngejawab, mak muneh pernah ngekhilong. Injuk mak didengini gawoh. Kidang sanak mandi mak pekhnah singkuh. Mawat muneh hak ngucakko ia sombong. Gelakhni sanak lunik. Dipa hak pandai aga sagagudaan.

Di kala dibi, sambil ngidokhko adingni, Nur nyanyi-nyanyi lunik sambil lapah keliling mik tanoman tiyung cabi sai wat di sekeliling lamban tian, sambil mampam khek nekhanjak adingni. Asok jak dapokh tian ngambubung mik langit, tandani makni lagi busak-sak’an. 

Tambah anom dibi, tambah lamon sanak mandi. Nurpuri buubah jadi muli putekhi ….

***

Khani buganti khani, bulan buganti bulan, tahun buganti tahun. Mak tekhasa adu telu tahun Muzakki ninggalko pekon, ninggalko puakhini, ninggalko khek kantikni, ninggalko Nurpuri. Ninggalko lamban di akhis wai udi. Telu tahun, kidang khasani injuk sa abad.

Tikham jama pekon. Mak ketahan lagi aga mulang. Bayangan mandi di wai jama khek kantik di pangkalan di khedik lambanni Nurpuri selalu menjelma, titokko mak dacok titok, tilupako mak dacok lupa. Khepa dia keadaanni Nurpuri tanno. Telu tahun nyak di khantau, mak nihan ngedok khabar bekhitani, ani Muzakki di lom hati.

Bayangan lamban di pinggekh wai terus bumain di pelupuk matani.

Mulang mik pekon bang khasani injuk adu lain cutik. Khek kantikni sai sa lamon adu mak kaliak’an lagi. Induh adu dipa muneh tian. Wat sai adu ngajong, wat sai buguwai, wat sai maktantu tebongni. Mulang mik pekon khasani injuk jadi jalma asing tiayab muneh, pengkhasani Muzakki.

Dibini ia sampai di pekon, Muzakki lapah mandi mik pangkalan sai di khedik lambanni Nurpuri, khangni tian mandi biasani sa. Sambil lapah tenggalan pikekhanni mak lepas jak pangkalan mandi, lamban di akhis wai sedi, khek Nurpuri. Adu khepa dia keadaanni Nurpuri, ani di lom hati. Tantu ia adu jadi muli sikop, kembang desa, jadi khebutanni mekhanai jak ipa-ipa. Tantu ia mak hak kenal lagi jama nyak. Tantu khasanni maganteng khek mabatin, ani Muzakki di lom hati. Mak kesasanan ia aga sampai di pangkalan mandi.

Sampai di pangkalan, diliakni mak melamon sai mandi. Angkah wat sanak-sanak lunik. Khek kantikni sai biasani mandi disan saiya mak ngedok keliak’an.

Pangkalan mandini masih injuk sa khiya kidang jukukni bang injuk tambah jimbung. Diliakni lambanni Nurpuri mekamak ikheh, mak tiandan. Yuh-yuh dipa-ipa, khek jukuk adu makejung, mak pekhnah titetak lagi. Diliakni muneh hatokni lamban saiya adu tukak-tukak.

“Dipa sai nunggu lamban seno?” ani Muzakki jama sanak mandi.

“Mak titunggu lagi. Tian adu maleh,” ani tian.

Muzakki kalemohan. Mak ditanyani maleh mik dipa. Bangukni mak dacok cawa api-api lagi. Angangonni melayang-layang ninggalko badanni.

Tihejong di akhis wai, mak laju mandi, matani mak maleh jak lamban di pinggekh wai no. Lamban saiya tambah saka tambah hancokh, bela dikanek waktu, ditinggalko sakebakni, mandok sai ngekhiwon keni lagi.

Injuk wek diliakni Nurpuri lapah sambil mampam adingni, keliling lamban, jak tuku mik tuku, singgah di tiap batang tiyung khek cabi. Jak bubungni dapokh tian luakh hasok, cakak mik langit, lebon di angkasa.

Hatini hancokh. Nurpuri, Nurpuri, ani di lom hati. Niku tanno tinggal di lamban gedung, mak diingokko lagi lamban sai di akhis wai ji.

Penyin-penyin didengini sanak nyanyi:

Nurpuri khadu lijung

Khadu butungga judu

Tinggal di lamban gedung

Kidang bahagia kudo niku

Kabar sai didengini Nurpuri tian sang lamban adu maleh pekon. Nurpuri adu ngajong jama Baba Ho Liang, tuan tanah khek saudagar sai lebeh tuha jak bakni, sai lebeh pantas jadi datukni. Kabarni Nurpuri dijadiko bakni tumbal pakai nebus utang. Bakni buutang jama Baba Ho Liang kidang mak dacok ngebayakh, Nurpuri dijadi keni panebus utang.

***

Cekhita sinji timuat juga di lom page Majalah Nyuara, Facebook

Read more

0 Ajong Salamah

“Angkat tangan….!!! Harta atau nyawa …???” ani Ipin jama khekni.

“Nyawa ….!!!” Ani khekni, sambil ngiwakko culuk.

Musim khisau.

Sapenanni musim khisau ji sanak-sanak dipa-ipa adu mayin gegakhongan unyin. Wek sai cicak jadi khisau, wek sai cicak jadi sai kemalingan, makai senapang jak kalekakni punti.

Hampekh tiap minggu pekon Makhgatuha pekau. Wek-wek gawoh lamban sai digegu khisau. Kemalingan. Jak lamban sai maleh mik lamban sai. Jak pekon sai maleh mik pekon sai. Sai dihagak tian selalu cangkeh. Sapenan khadu jak musim cangkeh saiya sangun hampekh unyinni lamban di Makhgatuha wat nyegokko cangkeh. Kik pak mak melamon, pasti wat cutik. Musim sekali saiya sangun musim ngagung. Musim balak Unyinni batang cangkeh nguah pukhebu-khebu.

Kidang khiya muneh diya pengkhasaanni jelma kamno. Tiap bingi tian mak dacok pedom. Mekhabai kintu bang di bingi seno kena gilekhan disambang khisau. Pekhnah tiyan ngadako khunda, kidang pekhcumah gawoh. Khisau laju juga. Kik pak unyinni penduduk pekon tikerahko mak temon kelawan. Penduduk Makhgatuha sangun mak pikha. Dipa jak lamon ni sai bebai muneh jak sai bakas. Bakasni sa pugelui-gelui muneh, dundong kik telopni tian mengan gawoh. Khek khisauni sa layin hak cutik, muluhan jelma, khek tian busanjata. Layin hak khisau sembakhang khisau, kidang khisau profesional, khisau sai nyenghaja. Halokpak wek sai lulusan luakh negekhi ya.

Ulehni khabaini, lamon ulun sai langsung ngejual unyinni cangkeh tian, kikpak khegani lagi mukhah ya. Kidang lamon muneh sai butahan, nunggu khega cakak. Biasani kik ampai takhu jak musim, khega makpak buyun kung.

Sapa kuwawa kik aga ngehadapi pelukhu. Asing kik tajomni pedang kik adu dihayu pelukhu mena kintu mak dacok cawa minduwa lagi ulehni. Pekhnah sekali sa wat sai kuwawa ngelawan, kidang makkuk ya kesipak ngibasko pedangni, iya adu mena tihuyung, disambut pelukhu di dadani. Sekali ditimbak tian gawoh hak tumpak tihangos do diya. Dipa timbakan sa mak muneh pekhnah meliset. Jak dinana mak ngendok sai kuwawa lagi ngelawan khisau. Kidang khiya muneh, kik nekham nukhut khiya makdo hak diapi-apiko tian. Mak diculek tian.

“Khepa Bedi, diakuk tian unyin kudo?” ani Pak Lunek Talha.

“Mawek muneh. Ajo wek ditinggalko tian sang kakhung lagi,” ani Pak Lunek Bedi. Senangun biasani, pengalaman sai khadu-khadu, khisau kamedi mak hak ngakuk unyin. Khupani tian tekhmasuk khisau sai buyun muneh. Khalok anak buahni Robinhood. Wek muneh sai ngucakkeni tian ngekhampok untuk nyepok biaya pekhang ngelawan Belanda.

“Payu kidah kik kheno. Adu ngelapor jama upas kudo?”

“Adu. Ajo lagi menah tian sa do.”

Mak saka jak seno khatong do upas telu mik lambanni Pak Lunek Bedi. Jelma sang pekon gunggun, aga ngeliak upas. Halok wek tian sai makkung pekhnah ngeliak upas selama tian hukhek. Kik mak ngedok sai kemalingan, makhak tian ngeliak upas. Kidang melamon muneh bebai tuha sai segok, mekhabai ngeliak upas.

Pekon Makhgatuha gila sangun di umbulan, mejawoh jak sai khamek, mak disikhang khang laya aspal. Khangni di bimbin, ngudanko pematang, ngehadap sabah bekhak. Jawohni jak khanglaya aspal wek khuwa kilo lebeh. Kik tian aga belanja musti lapah atau cakak kekhtangin mik pasakh. Pasakh sai paling khedek sekitakh telu kilo jawohni.

Pendudukni kikha-kikha 40 KK. Guwai tian tiap khani kik mak nyabah, ya mik kebun, nguyunko cangkeh khek damakh. Kik kebun sangun baktiando, peninggalanni tuyuk tukhing ian, kidang kik sabah bakni ulun unyin. Kelamonan tian ngeguwaiko sabah ni ulun, nyaseh. Kik pak sabah seno di hadapni lamban tian, kidang sabahni ulun unyin.

“Kejadiannya pukul berapa, Pak?” ani upas.

“Pukul duwa tadi malam,” ani Pak Lunek Bedi. Mujokh muneh ia pandai bahasa Indonesia, kikpak menyawit ya.

Angkah seno do muneh pekhtanyaanni upas sai lagi kuingokko. Sai bakhehni nyak adu lupa unyin, mani ulehni ngelagok ngeliak upas. Khamah jelma kamno sai ngelagok, tiangah. Induh ngelagok ngeliakni, induh mekhabai, induh kagum, halok semapu dipangkhasa. Kheno muneh nyak.

Halok kikha-kikha khuwa jam upas nanya-nanya jama Pak Lunek Bedi, kadu tian lijung.

“Api kik bang senapangni khisau jeno bingi bang injuk senapangni upas di do,” ani Pak Lunek Bedi nginah tian adu mejawoh.

“Senangun kik senapang gegoh unyin,” ani Pak Lunek Benu cicak pandai. Injuk pa ia adu pekhnah nyancan senapang ya.

***

Nyak mak nihan nyangko hak ajongku, Ajong Salamah, hak wek matek alimawong. Kidang khamah jelma kamno ngucakkeni kheno.

Sangun layin hak sekali khuwa kali nyak ngedengi cekhitani ulun tentang jelma sai matek alimawong, kidang nyak injuk pekhcaya injuk mawek.

Kabarni alimawong sai tipatekno layin hak alimawong biasa, kintu alimawong siluman. Kidang kena dinyak, cekhita sinji mak dacok kuanggap sepi, mak dacok hak aga injuk angin liyu khiya, kukhuk jak cuping kikhi, luakh jak cuping kanan. Mak dacok hak aga tepisko nihan mani ana nyangkut ajongku do, layin hak ulun bakheh lagi. Ajongku sai tinggal jama sekam sang lamban. Ajongku sai tiap khani kuliak khek kugaduh. Ajongku sai adu metuha, sai bawakni culukni khisok kupapijitko sekam, sai adu megelimekh. Ajongku sai khisok ngukhau sekam, “tuwah.”

Kapan nyak ngeliak ajongku, nyak selalu butanya di lom hati temondo kudo ia matek alimawong. Pekhnah muneh nyak butanya langsung, kidang mak dijawabni.

Khek sai nyani nyak ngelagok nihan gila mani ajongkuno bebai, umokhni juga adu mak mengukha lagi. Delom bayanganku ulun sai matek alimawong no tantu bakas gagah, pandikakh, bakas sai lagi kuwat khek mengukha, layin hak injuk ajongku no, bebai tuha sai adu mak kejiwaan lagi.

Kidang kik kutanya jama mak tian khuwa bak, tian makpekhnah ngejawab. ‘Induh’ gawoh ani tian. Kidang kik minak muakhi sang pekonno khamah adu pandai unyin, adu jadi rahasia umum. Walaupun kik titanya, ‘adu wat kudo keti ngeliak,’ khamah sai ngejawab makkung. Kheno muneh sekam sang lamban, makkung ngedok sai ngeliak. Induh kik senangun sengaja disegokko tian, mani ani Pak Lunek Benu ia khisok ngeliak alimawongno agi mejong deduguk di lepauni lamban sekam, kidang sekam mak ngeliak. Induh kik awakni Pak Lunek Benu ghiya, gelakhni Pak Lunek Benu.

Kik cekhitani ulun gila, alimawong patek’anno sangun mak setunggu di lamban. Mawek hak injuk matek kaci hak tiap khani aga tigaduh khek tikeni mengan. Khabakhni, alimawong saiya khatong sekali-sekali khiya, terutama kik dunia lagi mahakhiting. Senodo gunani, ani tian, kik dunia lagi mahakhiting.

Kik dunia lagi aman, alimawong no khatong telu minggu sekali, kak malam Jemahat. Di nana diya sakebakni ngenini mengan, teluini manuk. Cakha ngeni keni mak dacok hak aga sahadap-hadapan injuk ngeni kaci mengan. Teluini manukno tipecohkopai, kadu tisudukko jama culuk jak kudan. Sakebakni mejong nundunko alimawong, cekhitani. Induh kik temon makni.

Kik lagi ngedengiko cekhita seno, nyak ngebayangko ajongku. Khasani kagum khek ngelagok jama ia, campokh muneh jama khasa pekhcaya mak pekhcaya.

***

Bingi kelom. Mak ngedok bulan. Penduduk pekon Makhgatuha khamah adu pedom unyin, apilagi kik sanak-sanakni. Kidang lamon muneh sai mak dacok pedom, mekhabai kintu bang wat tamu sai mak tiukhau, tamu sai aga nyadang. Wat sai nyumpik candung. Wat muneh sai nyumpik kakhungni cangkeh. Mangi. Mak ngedok suakha api-api kintu jangkkhik nyanyi. Mak ngedok cahaya. Lamban-lamban injuk mati mandok penghuni. Sinakhni lampu minyak tanah mak tembus mik luakh, nyani khasa mangi tambah mangi. Sekali-sekali suakhani kaci ngayung kedengian jak jawoh.

Induh mengapi bingi saiya bang malelok ikheh pedom. Sekam sang lamban pedom lelok unyin, injuk kena sikhab. Mak nyakhaman lagi. Mak biasani hak bak tian khua mak pedom injuk sanak upi muneh. Biasani bak minjak pusasakhebok. Miyoh mik debah.

Di tengah pedom lelok saiya injuk wek kukhasa suakhani kucing laga. Mingokh ikheh. Hantakha ngekhasa jama mawek injuk kudengi suakha mengaum, ngabanting, ngahekhong, tambah saka tambah jelas khek maatang.

“Mak api udi …..!!!” aku jama mak, mekik. Mak tikanjat. Ngekhilong nyak. Kujulakko badanni mak. Dikhilongni nyak sakhebok, kidang kadu matani nenggakhah mik panggakh. Injuk dacok kubaca pengkhasani mak, hantakha mekhabai khek mak pekhcaya. Bak mak kuliak mani ia pedom di lapang luakh. Ajongku pedom di bilik sai lain.

“Kucing laga,” ani mak. “Adu. Pedom luwot.”

Kidang nyak mak dacok pedom. Mekhabai khek mangekhi. Suakha di luakh khibut temon. Muakni nyak ngedengi suakhani kucing laga sai injuk khedi.

Kukhapotko badanku jama mak. Nyak mak ketahan lagi nunggu pagi.

***

Pagini nyak minjak mehayu, kuliak ajong Salamah lagi ngelap lantaini lepau.

“Api ana, Jong?” aku jama ia. Kidang ia mak ngejawab, tekhus khia buguwai ngecahko lantai. Kuliak lantaini lepau mesuluhan pinsan, basoh ulehni khah.

***

Krui, 15 Maret 2012

Catatan:

1. Kik cekhitani jalma tumbai, wekdo ulun sai matek alimawong siluman.
2. Cerita sinji fiksi khiya, kik wek kejadian sai magagegoh, saiya angkah kebetulan gawoh, dang ya tisasemok.
3. Cerita sinji juga dimuat di page Majalah  Nyuara, Facebook, judulni Khisau.

Sumber gambar: http://www.paintingsilove.com/image/show/39441/tigers-rest

Read more

0 Ina Lunek Mala

Pagi-pagi hayu ina lunek Mala adu ngadako konferensi pers. Sapa bebai sai tiliyu mik pasakh, di gelekhni lambanni, diukhauni singgah. “Ajo numokhni hapeku, kidang nyak ngilu muneh numokhmu,” ani. Sangun gila di gelekhni lamban tianno khang ni ulun luakh likhi, sangun khanglaya ni ulun kak aga lapah mik pasakh. Jadi tepatdo kik ia nyegat ulun liyu di isan. Sangun khangni do.

Ina lunek Mala sangun ayin begawoh muneh ngiya kik lagakni, gegohdo tian khuwa pak lunek Benu. Pantasdo tian khuwa bujudu. Sangun palak salanggoman. Sepa gayani ulun pekhlupai kik ditutukko tian khuwa. Dukhipai soal mampu mak mampu seno. Ulun ngebeli tivi, tian ngabeli tivi muneh, ulun ngabeli parabola, tian ngabeli parabola muneh. Ulun nyani lamban bukeramik, tian nyani lamban bueramik muneh. Tijuwal api sai dacok tijuwal, pak kebun ya, kik adu mak katedos lagi. Halok kik ina tian khuwa laku tijuwal, dijuwal tian khuwa muneh.

Sai layauni gila kak tatikhuwan soal bekakha sinji. Menok ulun makai kawus T-shirt, hak aga bukawus T-shirt muneh. Menok ulun makai jeans, hak aga makai jeans muneh. Wat pinsan sa lalang kuk tenaiku menok ina lunek Mala makai celana ketat sai nyetak di badan udi, sai bahanni megagalimekh-megagalimekh. Mebangik kik badan seksi, pantasdo tiliyak. Inji badan tuha, kemiyut muneh, hak makai celana ketat. Tibinta nyakku di sai ngakhakhabai bukhung di sabah di.

Ya tanno layin muneh pumainan. Sepenan musim hape ji, tian khuwa asyik muneh ngemaiyinko hape. Di bingi di khani mak dacok lepas jak hape. Di dapokh buhape, di lapang luwakh buhape, di sumokh buhape, pukokni dipa-ipa buhape. Halok angkah kak tian khuwa pedom gawoh sai mak nyancan hape. Kik adu asyik ngemainko hape sa mak kik ingok api-api lagi. Khisok kuk ulun nagu mak tikhilong lagi. Titimbaldo kidang mak tikhilong, induh sapa jelmani sai nagu, mak tian mekhingoh keni lagi.

“Mengapi bang SMS-ku mak dibalos?” ani ina lunek Mala jama ina lunek Khena.

“Induh. Mak pak kuhakhiko,” ani ina lunek Khena. Dipa ambehni hak ina lunek Khena aga ngebalos SMS kik ia gila buta huruf. Wat-wat gawoh…..

Khiya muneh kik nelepon. Sapenanni nelepon mukhah ji mak takhu lagi tian khuwa nelepon. Induh sapa-apa titelepon. Induh api-api sai tikicikko di lom telepon, mak pak hak penting. Sai penting nelepon, kik ditanya ulun mengapi bang nelepon, jawabni mani tian aga nelepon. Halokpak sepa numokh sai tihalu titelepon.

“Adu di-ti-em-ko demu kudo?” ani ina lunek Mala jama minan Khos, pagi hayu, induh ia adu busap induh makkung.

“Makkung nyak ngekhukhuhko ti-em-no. Ajo nyak agi ni-em-ko tenaiku pai,” ani minan Khos sambil nganek langkut sang pinggan balak.

Kadu sapenanni mutokh mukhah ji, tian khuwa heboh muneh aga ngedok mutokh. Induh api aga gunani tian khuwa mutokh. Halok mani ngaliak ulun adu khamah bumutokh, tian khuwa mikhak bumutokh muneh, mak aga ketinggalan jaman itungni.

Induh api aga guna tian khuwa mutokh. Anak tian angkah khuwa. Sai tuha adu lijung mik Jawa, mite. Sai ngukha agi kelas khuwa SMP, mak hak ia pekhlu mutokh, mani sekulani mak hak mejawoh, dacok lapah cukut. Khek senangun tian biasa lapah cukut tiap pagi bakhong khek-kehkni. Guwaini Pak Lunek Benu angkah pekhulang mik kebun senodo, mik pagi mulang dibi, mak mungkin hak ia aga ngusung mutokh no mik kebun. Kebun tian mak dacok disikhang mutokh. Tantu ia mak kuwawa kik aga sekhukhuk di gagumok atau khegah cakak tebing makai mutokh. Kik Ina Lunek Mala gila ngakheko di lamban no do. Mak ilungni kintu mik pasakh, ngabeli tiyung cabi. Pasakh sa mak muneh hak mejawoh. Sangun gaguwaini bebai muneh pekhulang mik pasakh lapah cukut.

Ya adu betik itungni, adu bela timbangni, akherni jadi juga tian khuwa ngabeli mutokh. Sangun khegani mutokh sa gila mukhak muneh do, angkah sejuta, jak mukhahni jak khegani itek sekhati sang kaban bekhak. Kidang kadu tian khuwa musti nyicil kekukhanganni tiap bulan sampai telu tahun. Cicilanni senodo dia sai khisok aga jadi masalah. Melamon cekhita mutokhni ulun sai disita diler mani mak kebayakh cicilan.

“Maliyom ngiya kik ajo sampai aga ditakhek diler,” ani ina lunek Mala kudengi.

“Na kalau mawek,” ani pak lunek Benu.

Kalau do mawek, mani pengeluaran tian khuwa mak pak hak berat lagi. Anakni sai sekula tinggal sai lagi. Khek ajo khegani damakh injuk lagi buyun muneh.

Ya selesai ukhusan di diler, Pak Lunek Benu langsung diakhatko Mamak Ali mik tanah lapang, bulajakh bumutokh. Senangun gila Pak Lunek Benu makkung hak pandai bumutokh. Umokhni hukhek makkung wat pekhnah ia bumutokh. Khisokdo kik digunceng ulun, kidang kik ia sai dihadap makkung wek pekhnah diguwai keni.

Kidang halok bubakatdo muneh, angkah di lom sekhanino do pak lunek Benu adu pandai ngelapahko mutokhno tenggalan. Halok mani ia pandai bukekhtangin. Ani ulun tumbai kik pandai bukekhtangin mabudah muneh pandai bumutokh. Induh dia.

Ya adu telu khani, pak lunek Benu adu menalom, adu dacok tikasko mik pasakh. Adu pandai nyungakko daguni di khanglaya balak ngelagakko mutokh baruni. Tiap khani ia bumutokh. Induh mik ipa-ipa ilungni. “Ngebelako indrayenni,” ani kik titanya.

Ngeliak Pak Lunek Benu menalom bumutokh, Ina Lunek Mala mak muneh aga ketinggalan. Dipa diliakni bebai bakheh lamon muneh sai menalom bumutokh. Api bang nyak aga ketinggalan, mak gegoh di ulun, ani di lom hati.

Diukhauni minan Khos pakai ngelajakh ia. Minan Khos gila sangun menalom temon bumutokh. Kik tikeniko di ia mutokh, hak tumpak dikebut keni do dia. Mak ia ngekhukhuh keni. Kik adu di atas mutokh, mak ia kalah jama bakas. Khisokdo diguwai keni sai sakakebutan jama bakas. Lamon ulun ngucakko ia pembalap wanita. Halok angkah Paolo Rossi gawoh sai dacok ngalahko ia.

Kidang nawai ina lunek Mala mak hak injuk ngajakh pak lunek Benu. Halok mani ia mak pandai bukehtangin, jadi mak pak dihaluni selahni.

Adu sanemon Minan Khos nawaini kidang mak juga-juga dacok tikasko. Mak paham-paham.

“Kik pekhtama, pulalegohanpai nyakak ko gasni. Dang langsung tigas balakko, kanah luncat,” Ani Minan Khena wanti-wanti. Induh adu pikha kali ia ngucakko cawa seno. Ya mesinni hukhek, selalu diucakkeni kheno.

Kidang Ina Lunek Mala gila induh. Nggkhasah-nggkhusuh. Mak hak ia pandai sai aga pulalegohan no. Halok mak hak ia dacok ngebidako sepa sai gas balak sepa sai gas lunik. Begitu mesinni mutokh hukhek, langsung digas balakkeni.

“Uneeeeeeeeeekkkkkkkkkkk……….!!!!!!” ani minan Khos mekik.

Ina lunek Mala tigumbol, bakhong jama mutokhni. Lampu hadapni mutokhni pecoh, khek setangni kabelah melusut. Mujokh mak hak manemon ga cadangni mutokh baruno. Khek mujokh muneh gedung sekula sai ditumbokhni mak api-api, kintu angkah melusut goh cutik catni, bekasni khudani mutokh.

“Dangkung tumpak tigas balakko ngia aku,” ani Minan Khena.

“Induh. Penyanaku gila malegoh,” ani ina lunek Mala kalemohan, ngasni dehu-dehu tihabu. “Ya Allah ….,” ani. Disadakni tagakni tikekhah khek tikhasa manyesok. Diliakni cukutni tikekhah muneh cutik, khek melusut-lusut. Injuk kheji dia khasani tumbak jak mutokh, ani di lom hati.

Jak dinana mak dibinta keni lagi hak aga bumutokh.***

Read more

0 Musim Khisau

Minjak pagi nyak tikejut ngedengi suakha khibut-khibut. Satemonni gila makkung hak jadualku minjak, biasani nyak minjak kik matakhani adu nyiakh, kidang mani mega muneh khibutni suakha jak lamban kabelahno. Ciau makau mak tantu, injuk China kapecohan.

Mak kuk kesipak busap, nyak langsung luakh, bugabung jama tian sai khadu mena. Kuliak wek kik khuampuluh jelma gunggun di lambanni Pak Lunek Bedal, bekas-bakas, tuha-ngukha, sanak-khagah, wat unyin.

“Ajo na. Mak liak,” ani mamak Dkhabi nunjukko papan sang bilah sai adu lepas jak pakuni jama among Khesad. Among khesad tiangah. “Ya, jak isan khang laya tian kukhuk?,” ani. Kuliak papan sa adu longgar, dacok tigagisekhko. Rupani jak isan khanglaya tian nyungkil kuncini khangok.

Lambanni Pak Lunek Bedal gila sangun lamban kayu. Sesaini jak bilah-bilahni papan tisusun, tilekokko jama paku. Tihangni tihang kayu. Lantaini lantai tanoh. Pukokni kik khisau aga buguwai sangun mababudahdo, khek mak nyani suakha sai mekhibut ga. Sangun sang pekon seno khamah lamban tian injuk kheno unyin.

“Khara muneh keti bang mak bupengkhasaan,.Mak nyakhaman” ani Ina Lunek Sanah.

“Na induh diya,” ani Ina Lunek Ila, kajongni Pak Lunek Bedal.

“Jadi, api-api sai diakuk tian?”

“Ana cangkeh sang kakhung. Mujokh mak diakuk tian unyin,” ani Ina Lunek Ila.

Jelma kamno sibuk nindai khangok, khek lubang di sesai khangni papan sai dibukak khisau pakai khanglaya tian nyungkil kunci sambil ngedengisko keterangan jak tuan rumah. Kidang jak lamonni sai angkah nuntun khia, sambil ngedadengi, naku kicek, pakai bahan bucekhita muneh jama sai bakheh. Biasani kik ticekhitako luwot kisahni jadi bunjak kejungni.

“Mak nihan keti ngekhasa kudo?” ani bebai sai muneh.

“Mak nihan,” ani Ina Lunek Ila. “Kujok-kujokni sekam minjak pagi ngehalu khangok tiangap, khek cangkeh sang kakhung adu mak ngedok lagi.”

“Na adu kena sikhap dia keti no,” ani bebai sa.

Jelma sai gunggun tisaka tikhamik. Sapa jelma sai teliyu aga wek ilung pasti kik singgahpai, nanya api hal. Sangun lambanni Pak Lunek Bedal gila di khanglaya, khangni ulun liyu kik aga mik dipa-ipa. Tikekoh jelma sang pekon pandai uyin kadu.

“Adu ngadu jama pelisi keti kudo,” ani bakas sai.

“Adu,” ani Ina Lunek Ila.

Kadu mak saka jak seno Pak Lunek Benu singgah muneh.

“Api hal?” ani nanya. Induh nanya jama sapa.

“Ajo khisau jak kukhuk,” ani bakas sai.

“Tihakhiko dia demu. Kintu bang digilekh tian muneh,” ani bakas saiya muneh.

“Na, kupunggangko uluni kik ia bani ngegaduh denyak,” ani Pak Lunek Benu jumawa. Ayin begawoh Pak Lunek Benu. Kik ia adu ngicik, lewat unyin pukokni. Kidang induh dia temon mawat ni. Nanti keliak’an kik wat majasni. Kidang ulun adu pandai unyin, sangun khenodo Pak Lunek Benu.

***

Kadu mak mesaka jak seno, pekau luwot pagi hayu. Tanno maleh khang, mik hak doh. Bunjak jawohni jak khang sai sa. Nginah tisesui bang lambanni Pak Lunek Benu kena gilekhan.

Induh kapan kejadianni, mani nginah nyak sampai kupenok jelma kamno adu gunggun, sehinggoni latap gawoh lambanni Pak Lunek Benu.

Ya nyak sampai kuliak ulun Pak Lunek Benu tihejong di lantai, di atas sulan. Bangukni megak. Sapa ulun sai nanyani mak dacok dijawabni mani ia mak dacok cawa. Sebagai gantini, Ina Lunek Mala sai ngejawab cawani ulun. Kudengi-dengi cekhita, khupani Pak Lunek Benu jak dikhikus gakhong sabingi no khek jak disetuk gakhong sekali sampai iponni pungkuh khuwa.

“Khepa Pak Lunek?,” ani Minan Khena

“Na ajo diya,” ani Ina Lunek Mala. “Mujokh mak dipunggangko tian uluni, ….”

Read more

1 Maktiuloh Mudal

Ngeliak ulun bisnis, hak aga bisnis muneh Pak Lunek Benu. Halok mebangek diliakni ulun ghamah sai mebatin ulehni bisnis. Dighasani iya bang injuk tijegheh-tijegheh. Api kemakni kik guwaini gila angkah ngekui damagh senodo, mak ngedok pumainan bagheh. Kik mak ngekui damagh iya, paling-paling iya mik mukek, nulung ulun naghek talini pukek. Mansado diya iwa pukakabelah. Cukupdo pakai ngegulai. Kidang kik aga mebatin, agi mejawoh.

Sepenanni ghega cakak unyin ji, utokni tambah pusing. “Ghepa caghani kik ghegani binsin goh adu nom ghibu. Bias adu siwa ghibu. Sumang bayaghni listrik cakak muneh. Mak kemak aga selaghatando guwai sinji,” ani jama Pak Lunek Bedal api saka sa.

“Kintu negham tanno apah nyuba bisnis goh. Sapa pandai ghejeki gham disan,” ani. “Mak liyak ulun ghamah pubatin uleh bisnis. Udi si Sebi mubelni adu ghuwa-ghuwa ulehni bisnis damagh.”

“Mawek kik mabudah bisnis sa,” ani Pak Lunek Bedal. “Ayin kik mudal duwit gawoh. Bakat juga. Kik gham mak pandai-pandai ngemayin keni ghisok aga bangkrut. Udi melamon tiliak ghek tidengi ulun sai bangkrut, bela seghba bela ulehni bisnis sa. Mani mak bubakat, tipaksa. Kintu kik bakat negham macul, macul senodo diya.”

“Na mak lebeh ticubako pai. Api sai mak dacok kik gham aga buguwai. Kik ulun dacok, mengapi bang gham mak dacok. Jejama nganek mi unyin,” ani Pak Lunek Benu yakin.

“Maksudmu gila aga bisnis api?” ani Pak Lunek Bedal.

“Ajo binjai gham ji melamon,” ani Pak Lunek Benu. Di nana gila senangun lagi musim binjai. Batang binjai di pekon tian nguwah unyin. Mak kekanek-kanek. Tijual di pasar mak pak laku.

“Ghepa kik binjai ji tiusung gham mik kota. Tijual kita dudi,” ani Pak Lunek Benu.

“Kintu ngia mak laku. Makkung ngedok ulun sai nyuba ngejuwalko ana mik kota” ani Pak Lunek Bedal.

“Mengapi bang mak laku. Ghamah ulun di kota di geghing unyin binjai no. Mak liyak ghumah makan Palembang wat sambol binjaini,” ani Pak Lunek Benu muneh mak aga kalah.

“Payu kik aga nyuba. Kidang nyak ngeghek keni gawoh diya. Nyak ji mak ngedok duwit,” ani Pak Lunek Bedal.

“Gampang kik ulehni duwitno,” ani Pak Lunek Benu injukpak buduwit nihan ya..

***

“Adudopai ana. Mak hak temon. Kintu tianyutko mik lawok goh binjaino,” ani Ina Lunek Mala, kajongni Pak Lunek Benu.

“Mak hak ngedok ulun di kota di sai geghing binjai,”

“Ani sapa diniku,….” ani Pak Lunek Benu. “Mak lebeh ticubako pai. Ghenodo ngia usaha sa. Kik gham mak kuwawa nyuba dipa ambehni hak aga buhasil. Kintu kanah kak untung tiganti, tilapok muneh bungani. Kik untungni melamon kanah kutambah segegham lagi,” ani ngeghayu. “Ghepa caghani kik dunia injuk gheji,” ani muneh.

Ina Lunek Mala sayang nihan aga ngekasko ghantai mas ni. Hahani emasni, angkah lima gegham muneh. Hahanani kenang-kenangan jak musim cangkeh sa. Seno lagi sai lagi wat. Baghehni adu tijuwal unyin.

“Na ajo diya …. Kidang mak nyak aga pandai api-api, pukokni ghantai sinji haghus muloh. Kik pak mandok bungani, muloh pukokni gawoh,” ani sambil nyudukko ghantai sa. Mebiak nihan atini aga bupisah jama ghantaini no. Teghokpak iya gheghamutni luwot, gedahni sayangni.

***

Ya ghadu selesai unyin, Pak Lunek Benu beghangkat, dighekko Pak Lunek Bedal, nyiwa mubel carry.

Unyinni tian ngusung telu pikul binjai, halokdo lebeh cutek. Ya ghadu ngebayagh ghegani binjai ghek separo siwani mubel, wekdo diya sisani duwit jak ngejual ghantaino cutek lagi, kidang makkung kik ngebayagh supegh, ghek biaya mengan nginom tiyan dudi kanah. Kidang mak cigani, ajo ngiya wek binjai ji, ani Pak Lunek Benu lom hati.

Kadu megagah nihan tiyan ghua beghangkat, diilingko Ina Lunek Mala.

“Kakalau meghawan ….” ani Ina Lunek Mala. “Tingokko diya ghantaino,” ani jama Pak Lunek Benu.

***

Kadu, ghuwa ghani jak seno tiyan ticul luwot di pekon. Kusuk. Ghupani mak muneh hak mabudah bisnis sa.

“Ghepa ceghitani mamak?” ani Ina Lunek Mala, ya tiyan ghua tihejong.

“Na, api. Dang lagi guwai sinji,” ani Pak Lunek Bedal.

“Ghepa bang gheno?”

“Na makhak laku mawek. Kintu wat do sai ngabeli, sai ghuwa. Kelamonan ulun ngelagok ghia api gelaghni wah seno, halok pangghasa tiyan kanek’anni alu,” ani Pak Lunek Bedal. “Kintu ajo adu nganek umpan …”

“Na api ngia guwai keti ghuwa,” ani Ina Lunek Mala.

“Mabangek ngiya kik mak laku gawoh. Kintu ajo paghituk muneh aga ngetok keni kadu, mani baghang seno adu mabusuk. Na aheghni tiupahko di ulun muneh aga ngetokko ana,” ani Pak Lunek Bedal muneh.

Ina Lunek Mala ngambaghucut.

Pak Lunek Benu betik kelomni.

“Na gelaghni usaha,” ani.***

Read more

0 Pak Lunek Benu

Pukokni kik aga sababalak awak makngedok sai dacok ngalahko Pak Lunek Benu. Kik adu ngicik iya layin begawoh. Injuk iya unyin sai calak. Injuk iya pandai unyin isini di dunia ji. Kidang duniani mak hak lebeh jak tukuni pekon seno do. Pukokni, ani jalma kamno, ancak iya ngunjakko kicik jak ngunjakkko jinjongan.

Unyinni jelma sang pekon adu jak diawakkeni. Kidang tanno ulun adu pandai unyin. Ulun adu pandai kaghtuni. Kik sa gila agi lamondo ulun sai tiangah ngedengiko kicikni. Agi lamon do ulun sai peghcara. Ya tanno makngedok lagi sai nyemangogh keni. Ulun adu pandai unyinni. Makngedok pasni. Beladi sa’ayayapan ghiya.

Kidang injukni iya juga adu pandai jelma sang pekon mak aga lagi ngedengiko kicikni. Tanno kik ngicik jama jalma sang pekon iya mulai buyun-uyun. Halok mak mebangek lagi dighasani kik dikemitko ulun.

Kidang dang cuba-cuba kik betungga jelma jak luagh. Jadi santapannido diya. Peghnah waktu nyak mulang jak midogh, nyak menok Pak Lunek Benu lagi asik ngobrol di papanca jama jelma sai, induh jelma jak ipa bakas seno. Pak Lunek Benu sanemon buceghita, bakas seno tiangah ngedengini. Kena niku mamak aku delom hati, sambil nyak liyu.

“Tiap ghani ngia nyak nyumbangko ghah-ku,” ani Pak Lunek Benu sai kudengi. Kiamat aku delom hati, gheno kik hibatni kudo. Tiap ghani nihan iya nyumbangko ghahni mik PMI. Kidang induh kuk iya pandai induh mawat ghepa caghani nyumbangko ghah sa.

“Sangun gaguwaiko do kik seno,” ani muneh. Mak dihaghi keni nyak lalang dilom hati. Keliwatan ‘awakni Pak Lunek Benu ji, aku delom hati.

Kadu mak saka jak seno bang bakas saiya singgah muneh di lamban, nanya bakku.

“Bak lagi di sabah,” aku jama iya.

“Kapan iya mulang?” ani.

“Induh. Biasani dibi. Jam lima. Kak adu aga magghib,” aku.

“Payu kik gheno ucakko gawoh jama iya. Jemoh nyak ghatong luwot,” ani.

“Payu. Kemak gila tunggu pai. Halok saghebok lagi iya mulang.”

“Ikin gawoh ajo adu manom.”

Kak jemohni iya ghatong do. Kebetulan bak lagi wat di lamban. Ya ghadu jak basa-basi seghebok ghek ngenalko dighini, bakas saiya nyampaiko maksudni.

“Ajo gheji pekni Pak Lunek,” ani jama bak. “Maksudku mik dija ji nyak aga katulungan. Kidang nyak ji makkik pandai ga ngicek. Mak nyak pandai caghani kik aga bubasa-basi. Kintu teghus teghang gawoh, ajo sekam ghua ji adu saka tibulamban, adu pitu tahun. Kidang makkung ngedok uleh. Makkung ngedok ketughunan. Ajo kudengi jak Pak Lunek Benu di kabelahno, niku pandai ngelulahni. Ngilu tulung pai nihan ajo,” ani.

“Kacah …” ani bak tikanjat. “Mak nyak pandai kik guwai maghaheno. Kintu guwaiku ji mik sabah, ngababalek duniaji, ghek segok di lom pulan ji, ngekui batang damar. Mak nyak pandai kik aga guwai injuk gheno.” Ani bak muneh.

“Adu diayabko Benu diya niku ji. Dang melamon ga ngicek jama Benu di. Iya di senangun geghing ayayapan.”

“Ghiya kiya. Na api ngiya guwai sinji,” ani bakas saiya tikanjat.

“Ngilu maaf nihan ajo Pak Lunek,” ani sambil iya nangguh mulang, ghek busalam jama bak.

“Sikninani Benu,” ani bak, nginah bakas saiya adu lijung.

Read more

0 Ghamah Sai Aga Mebangek

Ya lulus SMP, Dghabi tumpak ngilu ngajong, mak ketahan lagi. Sangun ghadu jak kuruk SMP sa ya gila ghadu balegh, sumang jak ghek-ghekni sai ampai balegh nginah ghadu kelas ghua atau kelas telu SMP, bahkan wat sai sampai lulus SMP makkung balegh. Wat muneh sai sampai metuha mak balegh. Sangun badanni muneh bunjak balakni kik jak ghek-ghekni.

“Bu’ayuyunpai niku,” ani bakni. “Ampai nombelas tahun umoghmuno. Ana kuk udomu goh makkung ngajong. “Ancak bughencana ngelanjutko sekula. Liakpai sai bagheh sekula unyin. Malaliompai niku jama ghek-ghekmu.”

“Panghasamu gila ngajong sa mabangek. Aga tikeni mengan ngia anak kajong sa. Ayin kik aga tipahau gagek,” ani makni muneh. “Ana kuk niku beguai sa malas igheh. Api sai aga mahau anak kajong. Kintu ancak ngelanjutko sekula pai. Mak liak ulun, wat sai jadi duktor, wat sai jadi gughu, wat sai jadi pelisi. ….”

“Wat sai jadi beghuk nunggal,” ani Dghabi nimbal.

“Naiya niku gila aga jadi beghuk nunggal kudo?” ani bakni. “Segok di pulan udi kik aga jadi beghuk nunggal. Ikin campogh jama sai ghamek. Kik aga tinggal di pekon ji nutuk sai ghamik. Ulun sekula gham sekula muneh. Ulun jadi pegawai gham jadi pegawai muneh. Dang mak gegoh di ulun. Malaliyom. Cuba wek pai keti sang muaghian ji sai netis. Dang hambeghok unyin.”

“Ghamah sai aga ngajong, ghamah sai aga mebangek. Kidang bunjak bangekni kik ngajong gham ghadu wat cancanan, ghadu wat guwai.”

Drabi ngahema. Pusing iya ngadengi cawa nimak ghek bakni. Ngahema sai jak kighi, luagh sai jak kanan. Buganti-ganti teghus mandok taghuni.

Kidang ghepa caghani kik mak ketahan lagi gheji, ani Dghabi delom hati. Cintani jama Nughma maghelom temon. Maghabai igheh iya kintu bang Nughma diakuk ulun. Kikpak Nughma cinta nihan muneh jama iya, kidang iya masih ghagu. Meghabai kik Nughma beghubah geghing jama ulun bagheh. Makani iya ngughau Nughma ngajong geluk kik anu tamat SMP.

Bangik kik jejama ngelanjut sekula. Ghepa kik nyak ngelanjut iya mawat? Tantu kanah iya ngajong mena, ani Dghabi delom hati. Di bingi di ghani Dghabi mak mebangek mengan mikegh keni.

Kidang mujogh aheghni, Nughma aga ngelanjutko sekula muneh. Jadi Dghabi mak peghlu meghabai ga.

“Payu kidah kik gheno. “Kidang bujanji diya ….” Gham jejama sekula pai. Gham jejama nahan keni selama telu tahun ji. Kidang ghepa caghani. Ajo sanak sinji adu mak ketahan lagi,” ani Dghabi jama Nughma.

“Tumosko di lubangni gaghak,” ani Nughma.

***

Akheghni tian ghua sepakat, bujanji aga setungguan, setia sehughek semati. Kik pak ghalang betungga, dang ghubah hati delom, kik pak sumang sekula, dang sampai nyani liyom, janjini tian ghua. Induh api maksudni ‘nyani liyom’.

Setahun teliyu …. Tian ghua tetap setia. Tetap secancanan kicik. Nughma mak balin pileh, gheno muneh Dghabi. Kidang ghia muneh diya tedosni hati delom …. Mak ketahan, Teuw …,” ani Dghabi selalu.

Ghua tahun teliyu …. Maseh tetap utuh. Kidang sayangni bang cadang nginah adu di tahun ketelu. Selama tian ghua mejong di kelas ghua, selamat mak teghjadi api-api.

Induh mengapi bang sanak sekula tanno gumah sai cadang nginah adu di tahun terakhir, malah lamon sai mengalami ‘kecelakaan’ nginah adu aga ujian. Halok sangun adu jadi tumbalni sekula masing-masing, tiap tahun wek gawoh sanak mughid sai gagaan ngajong nom bulan lagi aja Ujian Nasional. Wat muneh sai telu bulan lagi aga ujian. Padahal biasani, sanak seno, teghutama sai bebaini, keliak’anni injuk buyun bughukun. Kidang ghupani sangun adu cadang jak lom ….

“Ghepa Dghabi, bang nganjang kepas mak nganjang ghekang?” ani minak muaghini.

“Ghamah sai aga mebangek,” ani Dghabi injuk mak ndok salah.***

Read more

0 'Ghepa Pekni?'

Ceghita inji lain ‘awak lain babuhungan. Inji ceghita satemon. ‘Kisah nyata’ kik ani ulun sai ghisok nuntun sinetron. Maksudni ceghita inji pakai nyani kelalangan ghia. Lain hak aga ngawada, lain muneh ngahina. Kilu mahaf samakkungni kintu bang wat minak muaghi sai singkuh ngadengi cheghita sinji. Lain maksudku aga ngawada. Kintu ajo pakai ngalindawko akal kita ghia, ubatni pusing.

Sangun adu kebiasaan gham jalma Krui, sa pasagh jama sa unggak ghek sa doh lain kelitahni, lain logatni. Kik ani sa pasagh ‘cubik’ ani sa unggak ‘cubek’. Kik ani sa pasagh ‘cabik’, ani sa unggak ‘cabek’. Kik ani sa pasagh ‘mepahik’, ani sa unggak ghek sa doh ‘mepahek’. Kik ani sa pasagh ‘melunik’, ani sa unggak ghek sa doh ‘melunek’, dan lain sebagaini.

Kik sanak sa kula gila ghisok ghibut ulehni bahasa kameno. Ingok nyak lagi sakula tumbai campogh jama jalma jak doh ghek jang unggak. Ya kik jalma jak doh ghek unggak cawa, sa pasagh nga’ayayuh keni. Gheno muneh kik sa pasagh sai cawa, diayayuhko sa unggak ghek sa doh. Sanak sakula dinana ghisok ghigu ulehni injuk gheno, kidang wek ghisokni sai salalangan ghia.

Kik sanak sa unggak kena wada jalma pasagh, biasani tian ngebalos muneh, “Yu, uy. Keti gila nganik mi handap. Sekam nganik mi handop,” ani tian.

Sa kali ketika wat bakas Liwa kawin jama jama bebai jak Karya Penggawa lumpak wai. Pukokni daerah sekitagh Kebuaian tihak udi. Nyak mak dachok ngucakko pekonni, kintu kanah tian singkuh muneh sai jak pekonno.

Bakas Liwa no saumogh hughekni mak pernagh tinggal di Krui. Sa Liwa tutok. Ia angkah mik Krui sakali-sakali gawoh, mamidoghan jama ghekni jak Liwa, ngaliak Lawok.

Sapenan jak kawinno tian ghua ceghitani tinggal di Liwa. Bebai seno nutuk muneh jadi sa Liwa. Angkah sakali-sakali gawoh tian tughun mik Krui, kik wat guwai.

Sakali ketika muneh nyak nutuk ghek mik pesta di Liwa. Di ghang pesta, kebetulan sekam butungga jama bakas seno. Sambil sababuwaan—marok kik ani sa Liwa—mulai  dia bakas seno buceghita. Ya dikinongni sekam ghua jak Krui, mulai ia nyeghita ko deni, pengalamanni kik mulang mik mantuhani di Krui. Kebetulan bakas seno senangun mapintagh nyeghita, sehinggoni nyani kelalangan do.

“Jadi peghtama-tamani nyak ngelagok, ghek tikanjat,” ani bakas Liwa no. Kik nyak lagi mejong, madagh, di lepau ghisok putungga minak muaghi teliyu di hadapni lamban. Kidang nyak ghisok aga lalang ngedengi penaguni tian. Ghatong sai, “Ghepa pekni?” Ghatong sai, “Ghepa pekni?” Ghatong muneh sai lagi, “Ghepa pekni?,” ani.

“Kik aku gila meganggu. Hagha muneh injuk makngedok bahasa bagheh. Mengapi kik, “Ghepa caghani?”, “Ghepa cehitani?,” “Api guwai?,” kan mebangik ngedengini. Inji, “Ghepa pekni?,” ani, sambil sa Liwa ngekak ngelahai, kuk sa Krui muneh nutuk.

Kidang ghek jak Liwa-no lain hak ia aga ngawada. Kintu lucu ghia pandengini mani ia mak biasa ngadengi penagu sai injuk gheno.

Satemonni gila kuk sa Krui ngia ghisok aga lalang ngadengi penagu injuk gheno, apilagi tian sai jak pasagh. Sa Krui, khususni sa pasagh, lamon muneh sai mak biasa ngadengini.

Injuk adu ku ucakko jeno, kelitahni sa Krui sumang-sumang. Kik sa pasagh biasa makai kelitah ‘i’ (‘lunik’, ‘cutik’, ‘pelik’, ‘bangik’, ‘pik’ dll), sa unggak ghek sa doh biasa makai kelitah ‘e’ (‘lunek’, ‘cutek’, ‘pelek’, ‘bangek’ ‘pek’ dll).

Kik ani sa pasagh ‘Pikko disan,” ani sa unggak ghek sa doh, “Pekko disan.” Kik ani sa pasagh, “Ghepa pikni?,” ani sa unggak ghek sa doh “Ghepa pekni?.”

Sai nyanini meganggu gila, terutama untuk jalma sai jak luagh Krui, kata ‘pek’ no dacok muneh begheti baghangni bebai. Disan dia megangguni. Seno muneh sai nyani sa Liwa lalang sampai tikiyoh-tikising.***

Read more